Festival 
med stø kurs

Det var også band som Made in Corea og Monty Alexander Trio, før vi siste kveld enda opp på Herr Nilsen, med saksofonisten Scott Hamilton i stilfullt samspel med pianist Jan Lundgren og hans svenske medmusikantar, med ein kombinasjon av både amerikanske og svenske evergreens som Stan Getz og Jan Johansson også kunne ha gjort saman.

For denne medarbeidar var førstemann fredag Monty Alexander, den lett stormannsgalne pianisten fødd på Jamaica som spelte på den første Oslojazz-festivalen, og som på tradisjonsrike Edderkoppen fann sitt kjernepublikum som jazzens showmann. Han kan heile katalogen av jazz og populærmusikk og kan med sin trio halde det gåande med kva låt som helst, mens han på denne kvelden, stolt over opphavet, også heidra sin reggae-landsmann med to av Marlows finaste songar. Eit høgdepunkt av ein annan kaliber var John Surman, som fredag i spissen for Bergen Big Band sytte for den største storbandopplevinga på lenge, med musikk som alt er spelt inn på albumet «Another Sky». Som komponist, orkesterleiar og utøvar på baryton og sopransaksofonist, var han i storform med eit band der solistane stod i kø, med bandets drivkraft, altsaksofonist Olav Dale først i fylkinga.

Made In Corea er eit storarta norsk band som har spesialisert seg på musikk av Chick Corea, glimtvis opplevd laurdag ettermiddag i konkurranse med TV-kampen Viking-Sogndal, der saftkokarane sølte bort 2-0-leiinga og tapte 2-4. Motsett ein Django Bates i sterk stiging med sin «Beloved Bird», etter plata av same namn. Saman med bassist Peter Eldh og trommeslagar Peter Bruun heldt Bates ein gnistrande konsert. Siste kveld heldt Christiania 12 konsert til minne om festivalgründer Aage Teigen, som også var med i bandet. Unge nordiske talent heldt dagleg konsertar på Musikkplakaten, ny utescene Karl Johan. På festivalen som stadig held sin jazz-sti rein, i kombinasjon med nye uttrykk.