Nye takter

Jazz som magi

Med Sinikka Langeland kom jazzen til skogs, eller var det omvendt? Magisk er det i alle fall.

Med framføringa av «The Magical Forest» (ECM/Musikkoperatørene), tek strengespelaren og songaren oss med på ei musikalsk reise basert på skogfinske mytar. Medverkande er også den kjende vokaltrioen Mediaeval med Anna Maria Friman, Berit Opheim og Linn Andrea Fuglseth, som elegant smeltar tradisjonsmusikk med eit moderne uttrykk. I det faste bandet hennar spelar nokre av våre mest dugande jazzmusikarar, også når det gjeld å krysse grensene. Og tekstane på omslaget vekslar mellom engelsk, finsk og norsk.

Saksofonist Trygve Seim har nyleg hatt suksess på plata «Rumi Songs», trompetist Arve Henriksen er eit unikum både som vokalist og trompetist, og bassist Anders Jormin og den finske trommeslagaren Markku Ounaskari er av det same frie lynnet. Sinikka Langeland har i fleire tiår arbeidd med den skogfinske kulturarven både som tradisjon og inspirasjon for sin eigen musikk, og med innspelinga av «The Magical Forest» har Sinikka Langeland gjort eit meisterverk.

Hayden møter Haarla

«Ante Lucem» (ECM/Musikkoperatørene) heiter eit mektig verk for jazzkvintett og symfoniorkester, signert den finske pianisten og harpespelaren Iro Haarla i 2012, innspelt for Norrlands Opera Symphony Ochestra, no gitt ut på ECM med fleire nordmenn i stallen. Mellom dei trompetisten Hayden Powell og saksofonisten Trygve Seim, den svenske bassisten Ulf Krokfors, trommeslagar Mika Kallio, og med Norrlands Operans Symfoniorkestern dirigert av Jukka Lisakkila. Musikken er like storfelt som namnelista tilseier. På eit strålande verk som må nytast med godt armslag, med Hayden Powell sentral i verket til siste slutt.

På tur med Frode Haltli

Frode Haltli er solist på akkordeon på albumet «Air» (ECM/Musikkoperatørene), med Trondheim Solistene og Arditti-kvartetten. Frå han i 2002 vann Spellemannprisen med albumet «Looking on Darkness» har han spelt i alle slags konstellasjonar, her med musikk av to danske komponistar.

Mer fra: Nye takter